Шәкәрім атындағы Семей мемлекеттік университетінде Қазақстан Республикасы Парламенті Сенатының депутаты, қоғам қайраткері Ғарифолла Есім «Абай арманы» зиялылар клубының кезекті отырысына қатысты, деп хабарлайды Altaynews.kz тілшісі Семей қалалық ішкі саясат бөлімінің ақпараттық секторының мәліметіне сүйеніп.
Басқосуға қаланың зиялылары, еңбек ардагерлері, ғалым, профессорлар, оқытушылар, магистранттар мен студенттер жиналды.Көрнекті философ-ғалым, жазушы, академик Ғарифолла Есім «Шәкәрім және бүгінгі заман» тақырыбында дәріс оқыды. Ғалым өз сөзінде қазіргі заман мен Шәкәрімнің заманын салыстырып, Шәкәрімнің сол кездегі жазғаны - қазіргі ұрпаққа рухани байлық, тәлім - тәрбие, азық екенін айтты. «Шәкәрім өшпейді. Шәкәрім әр ұрпақтың замандасы», - дей отыра ұлы философтың артынан қалдырған сөздерін оқып, анықтама беріп, қазіргі заманмен салыстырды.
«Шәкәрім бабамыздың айтуынша заманға сай болу - қазіргі Қазақстанның инновация жолындағы бастапқы міндеті. Дамыған 30 елдің қатарына қосылу үшін заманға сай адам болу керек. «Ақылды жанның мүлкі - әлемі», - дейді Шәкәрім. Ақылды жан ол кім? Ақылды жан ойын жүзеге асыра алатын, іс- әрекетінің нәтижесін көретін адам. Егер ақылмен жұмыс істесең, бүкіл әлем сенікі», - деп ғалым 1930 жылдарда Шәкәрімнің жазып кеткендерін қазіргі заманмен ұштастырды.
Академик Шәкәрім шығармаларына сүйене отырып, бүгінгі жастарға тәрбиелік ұлағаты мол дана пікірлері мен ойларын ортаға салды.
