Шығыс Қазақстан облысының көпсалалы онкология және хирургия орталығында отандық және шетелдік онкологтардың қатысуымен «ONKO WEEK VKO» ғылыми-практикалық конференциясы ұйымдастырылды, деп хабарлайды  Altainews.kz тілшісі.

Оған онкологиялық орталықтың мамандары, сондай-ақ Алматы, Астана, Тбилиси және Санкт-Петербург қалаларынан дәрігерлер шақырылған. Мамандар онкоурология, онкогинекология және торокальды хирургия саласында 13 ота жасады.

Онкологиялық орталық Қазақстанның түкпір-түкпірінен келген хирургтар үшін оқыту алаңына айналды. Конференцияға еліміздің түрлі аймағынан 30-ға жуық дәрігер жоғары технологиялық, шағын инвазивті операцияларды жүргізу тәжірибесін алу үшін келді. Келген хирургтар операцияларды тек тікелей эфирде емес, сонымен қатар онлайн режимінде де бақылай алды. Трансляция барысында сұрақтар қойып, жедел топтармен сөйлесуге мүмкіндік алды.

Тбилиси американдық госпиталінің урологиялық бағытының басшысы, медицина ғылымдарының докторы Давид Николеишвили, сондай-ақ жоғары санатты дәрігер-онколог, Санкт-Петербург фтизиопульмонология ҒЗИ торокалды хирургы Андрей Нефедов ШҚО-дағы онкологиялық орталықтың жабдықталуы мен мамандардың біліктілігін жоғары бағалады, сондай-ақ одан әрі нәтижелі ынтымақтастыққа сенім білдірді.

Үш күн бойы іс-шараға қатысушылар онкохирургияның заманауи тақырыптары бойынша баяндамалар жасады, қатерлі ісікті емдеудің заманауи әдістерін талқылады, сондай-ақ дәрілік препараттарды қолдану тәжірибесімен бөлісті.