"Торпедо" жас хоккейшілерге сыйлық жасады
Өскемендік «Торпедоның» 2007 жылы туған жас хоккейшілері жаңа спорттық киім мен басқа да керек-жарақтарға ие болды. Мұндай сыйлықты балғын спортшыларға клуб басшылығы жасады.
Айта кетейік, биылғы қазан айында шайбалы хоккейден олимпиадалық резервтегі облыстық мектеп ресми түрде «Торпедо» клубының қарамағына өткен-ді. Осының арқасында жас хоккейшілер Қазақстан мен Ресей біріншіліктері аясында басқа қалаларда өтетін ойындарға өскемендік клуб есебінен бару мүмкіндігіне ие болған. Сонымен қатар енді балғын торпедолықтар спорттық форма мен керек-жарақтардан таршылық көрмеуі тиіс.
Осы ретте, ел чемпионатымен қатар, Ресей біріншілігінде де өнер көрсетіп жатқан 2006 және 2007 жылғы торпедолықтар биыл тұңғыш рет В тобында (Сібір аймағы) үздіктер қатарынан көрініп, жоғарғы дивизионға өту мүмкіндігіне ие болғанын айта кеткен орынды.