Шығыста комсомол ұйымының 100 жылдық мерейтойы тойланбақ па? Қазақстан коммунистік халық партиясы қоғамдық бірлестігінің облыстық филиалы жуықта дөңгелек үстел өткізді, деп хабарлайды Алтайньюс тілшісі.

– 29 қазанда комсомол ұйымының құрылғанына 100 жыл толады. Бұл ұйым кезінде елдің дамуына зор үлес қосқан. Біздің партия кеңес одағы идеологиясын жалғастырушы болғандықтан, комсомол ұйымына қатысты жақсылықтарды еске алмақ. Сондай-ақ қазіргі жастар саясатын жетілдіру үшін ол ұйымнан қажет тұстарын алуды ұсынбақпыз, – дейді Сергей Михеев, Қазақстан коммунистік халық партиясы қоғамдық бірлестігі Шығыстағы филиалының екінші хатшысы.

Сергей Михеев сөзінше, Президенттің бастамасымен біздің жас елде жастарға арналған көптеген жоба іске асырылуда.

– Жас мамандарды қолдау, ипотекамен тұрғынүй беру, білім алу гранттары сынды жобалар маңызды әрине. Бірақ бұлар аймақтық және салалық деңгейде маңызды. Қазір жастарға үлгі болатын тұлғалар мен ұлттық құндылықтарды насихаттау өте күңгірт. Жастар батыстың кинолары мен бағдарламаларын көріп, жағымсыз образдарды таңдауда.

Зерттеулер нәтижесінде анықталғандай, жастар молшылық пен жайлылықты қалайды. Бірақ соған лайық еңбектенбейді екен. Сондай-ақ олар шет елге көшіп кетуге әуес.