Өскеменде трамвай жүргізушілері жетіспей жатыр
Өскеменде трамвай жүргізушілері жетіспейді. Көлік компаниясының мәлімдеуінше, осы себепті №2 трамвай маршрутын тоқтатуға тура келді. Мамандар енді мәселені тегін оқыту есебінен шешуді жоспарлап отыр, деп хабарлайды Алтайньюс тілшісі.
– Біріншіден мамандар тұрақсыз. Сондай-ақ бұл мамандықтың ерекше жеке дайындықты талап ететіндігін ескерген жөн. Сол себепті жүргізушілер жеткіліксіз. Біз жұмыспен қамту орталығымен және оқу орындарымен бірлесіп, осы мамандықты оқыту бойынша жұмыс жүргіземіз, – дейді «Өскемен Көлік Компаниясы» ЖШС директоры Тимур Сағалиев.
Компанияның мәлімдеуінше, қазір рельске күн сайын 16 вагон, сенбі күндері - 14, жексенбі күндері - 12 вагон шығады. Аталмыш мамандық оқытылған күнде, көлік компаниясында барлық түлектерді жұмыспен қамтамасыз ете ала ма? Ол жағы әлі нақтыланған жоқ.