Қазақстанда ауыл шаруашылығы өндірушілерін қолдауға бағытталған екі жаңа ірі қаржылық бағдарлама іске қосылады. Бұл бастама Мемлекет басшысы Қасым-Жомарт Тоқаевтың ауыл шаруашылығы өнімінің жалпы көлемін екі есе арттыру жөніндегі тапсырмасын орындауға арналған Үкімет отырысында жарияланды, деп хабарлайды Altainews.kz тілшісі. 

Ауыл шаруашылығы саласын жаңғыртуға арналған бұл бағдарламалар аясында жеңілдетілген несие 5% мөлшерлемемен беріледі. Жалпы көлемі – 100 млрд теңге.

Бірінші бағдарлама – 50 млрд теңгеге ірі қара және ұсақ малдың асыл тұқымдарын сатып алуға бағытталған. Бұл шара отандық мал шаруашылығындағы генетикалық қорды жақсартып, өндіріс қуатын арттыруға мүмкіндік береді. Несие ұзақ мерзімге беріледі, бұл – ауқымды капитал салуды қажет ететін сала үшін маңызды.

Екінші бағдарлама – тағы 50 млрд теңге – ауыл шаруашылығы тауарын өндірушілерге айналым қаражатын толықтыру үшін бөлінеді. Оған жем-шөп сатып алу, жанар-жағармай, ветеринариялық препараттар, логистика және басқа да маусымдық шығындар жатады. Бұл несиелер де 5% мөлшерлемемен ұсынылады.

Аталған бағдарламалар агросектордың тұрақты дамуына серпін беріп, ішкі нарықты отандық өніммен қамту үлесін арттыруға ықпал етеді. Әсіресе, жаһандық тұрақсыздық жағдайында мал шаруашылығына қолдау көрсету – азық-түлік қауіпсіздігін қамтамасыз етудегі стратегиялық шешім.

Үкімет отырысында бұған қоса ветеринариялық бақылауды күшейту, цифрландыруды жеделдету, оның ішінде мал санын есепке алудың автоматтандырылған жүйесін енгізу, эпизоотиялық жағдайды бақылау мен мемлекеттік қолдау шараларын цифрлық форматқа көшіру мәселелері талқыланды.

Дамир Омаров