Күнделікті өмірде кез келгеніміз дүкен сөрелерінде абайсызда бір затты қағып кетіп, сындыруымыз мүмкін. Бір сәттік аңдаусыздық – ал кейде дүкен ішіндегі қолайсыз жағдай – осындай келеңсіздікке себеп болады. Бірақ мұндайда кінә кімде? Шығынды кім өтейді? Бұл сұрақтарға жауапты Altainews.kz тілшісі іздеп көрді.

Тауардың бүліну жағдайы әртүрлі болады. Егер сатып алушы тауарды қолына алып, оны түсіріп алғаны бейнебақылауда нақты көрінсе, не болмаса мас күйде немесе қоғамдық тәртіпті бұзып, әдейі зақым келтірсе – дүкен әкімшілігінің шығынды өтеуді талап етуге толық құқығы бар. Сондай-ақ төбелес, тәртіпсіздік сияқты жағдайлар кезінде дүкен мүлкіне зиян келсе, жауапкершілік кінәлі тараптарға жүктеледі.

Ал егер оқиға кездейсоқ болса – мәселен, өткел тым тар, қораптармен бітеліп қалған, сөрелер тұрақсыз орнатылған немесе еден тайғақ болған жағдайда – сатып алушыға айып тағу заңсыз. Мұндайда кінә дүкен әкімшілігінде. Себебі тұтынушы қауіпсіздігіне жағдай жасау – сауда нүктесінің басты міндеті.

Мысалы, тар өткелде арба сүйреп келе жатқан адам байқамай шөлмектің бірін қағып кетсе, не бір бөтелкені алған кезде екіншісі құлап түссе – бұл «қасақана бүлдіру» емес, қауіпсіздік ережелерінің бұзылуынан туындаған жағдай.

Мұндай сәттерде сабыр сақтау, жағдайды бейнежазбаға түсіру, куәгерлер табу – өз құқыңызды қорғаудың тиімді жолы. Оқиғаны растайтын бейнематериал немесе куәгерлердің жазбаша түсініктемесі сіздің кінәсіз екеніңізді дәлелдеуге көмектеседі.

Кейде дүкен қызметкерлері немесе күзетшілер сатып алушыны бірден айыптап, төлемді талап етуі мүмкін. Бірақ заң бойынша, дәлелсіз айыптау – тұтынушы құқығын бұзу болып саналады. Сондықтан эмоцияға берілмей, байыппен, заң аясында әрекет ету маңызды.

Ақырында, мұндай оқиғалар тұтынушы мәдениеті мен қызмет көрсету мәдениетінің айнасы іспетті. Дүкен иелері үшін бұл – қауіпсіздік пен ыңғайлылық стандарттарын күшейтуге себеп болса, ал сатып алушылар үшін – ұқыптылық пен жауапкершілікті еске салатын сабақ.