Көліктердің жылдам қозғалысы Пограничная тұрғындарын алаңдатып отыр – Өскемен
Фото: автордікі
Пограничная көшесінің Назарбаев даңғылынан басталып Бажов көшесіне дейін жалғасатын бөлігінде жол жөндеу жұмыстары аяқталды.
Жөндеу жұмыстарын жүргізген мердігер – «Өскеменспецкоммунтранс» ЖШС, деп хабарлайды Altaynews тілшісі.
Қаланың бас жоспарын іске асыру шеңберінде жөнделген жолдың ұзындығы – 793 м.
– Бұл Пограничная көшесінің жалғасы. Естеріңізде болса, бұл жердегі жолдың тоз-тозы шыққан еді. Жүк көліктерінің көбі осы жол арқылы өтетін, сондықтан биыл жолды жөндейміз деп шештік. Жөндеу жұмыстары бір жарым айда аяқталды. Бір ай бұрын осы жерге келгенмін. Орталық даңғылдан Бажов көшесіне дейінгі жол жөнделді, – дейді қала әкімі Жақсылық Омар.
Әкім “Жол активтері сапасының ұлттық орталығының” мамандарымен бірлесіп, жол жабынының қалыңдығын тексерді.
Қала әкімі жұмыс сапары аясында аталған көшеден тағы бір мәселе байқағанын айтты.
– Бұл жерде екінші сұрақ туындады. Көліктер жылдам жүреді, бұл осы жерде тұратын тұрғындар үшін өте қауіпті. Сондықтан енді камера мен жылдамдықты азайтуды ескертетін қосымша белгілер орнату мәселесін шешпекпіз. Бұл, біріншіден, тұрғындарға қауіп төндірмеу үшін. Екіншіден, шу аз болуы үшін, – деп түсіндірді Жақсылық Омар.
Оқи отырыңыз
