Өскеменде полиция қызметкерлері жаңа жылдық шыршаны ұрлаған адамды ұстады.

"102" жедел арнасына қала дүкендерінің бірінің иесі жаңа жылдық шыршаны ұрлап кеткені туралы өтінішпен жүгінген. Жедел-іздестіру шаралары барысында қызметкерлер бейнебақылау камераларының арқасында маршрутты ғана емес, күдіктінің жеке басын да анықтады, деп хабарлайды Altaynews.kz тілшісі.

Ол бұрын істі болған облыс орталығының 49 жастағы тұрғыны болып шықты.

Ер адам полиция қызметкеріне дүкенде мас болғанын және сөреде жатқан жасанды шыршаның оған қатты ұнағанын, сондықтан оны пәтерін безендіру үшін алып кеткенін айтқан.

Оның әрекетіне не түрткі болса да, қылмыс қылмыс болып қала береді.

Осы факті бойынша ҚР ҚК-нің 188-бабы 1-бөлігі "Ұрлық" бойынша қылмыстық іс қозғалды. Әрі қарай тергеушілер түпкілікті процестік шешім қабылдайтын болады.

Бұл оқиға Өскемен қаласы Полиция басқармасы Ертіс полиция бөлімі КПБ-нің жедел уәкілдер қатарына бір апта бұрын кірген полиция лейтенанты Ақжол Құсманның ашқан алғашқы қылмыстық ісі екенін атап өткен жөн.

Айжанат Бақытқызы