Мемлекет басшысы Қасым-Жомарт Тоқаевтың Жарлығымен Нұрлан Ермекұлы Сауранбаев Қазақстан Республикасының Көлік министрі қызметіне тағайындалды, деп хабарлайды Altainews.kz тілшісі Ақордаға сілтеме жасап.

Бұл шешім елдегі көлік және инфрақұрылым саласын дамыту, сондай-ақ жол қатынасын жетілдіру бағытындағы жұмыстарды жүйелі жүргізуге жаңа серпін береді деп күтілуде.

Айта кетейік, бұған дейін Сауранбаевтың кандидатурасын Мәжілістің Экономикалық реформа және өңірлік даму комитеті қолдаған болатын.

Нұрлан Сауранбаев 1967 жылы Жамбыл қаласында дүниеге келген. С.М. Киров атындағы Қазақ мемлекеттік университетін, сондай-ақ Италиядағы Мұнай өнеркәсібі бойынша оқыту орталығын тәмамдаған. Мамандығы – экономист, мұнай саласын басқару ісі бойынша магистр.

Еңбек жолын 1991 жылы жеке коммерциялық компанияның басшысы ретінде бастаған. Кейінірек Қазақстан кәсіпкерлер конгресінің атқарушы директоры болып қызмет атқарды. 1998 жылдан бастап "Қазақстан темір жолы" кәсіпорнында департаментті басқарды. Мұнай-газ саласында да бірқатар маңызды қызметтер атқарған: "Қазахойл" компаниясындағы Атырау мұнай өңдеу зауытын жаңғырту жобасын басқарған, сондай-ақ "ҚазМұнайГаз" ұлттық компаниясында инжинирингтік жобаларға жетекшілік етті.

2000 жылдардың ортасында "ТеңізСервис" компаниясын басқарды, кейіннен "ҚазМұнайГаз"-да басқарушы директор болды. Бұдан соң "Самұрық-Қазына" қорында және мемлекеттік басқару саласында түрлі лауазымдарда еңбек етті. Ол индустрия және жаңа технологиялар вице-министрі, кейін Қорғаныс министрінің орынбасары болды. ЭКСПО-2017 көрмесіне дайындық пен оны өткізу бойынша ұйымдастыру жұмыстарын басқарды.

2017–2018 жылдары Шымкент қаласының әкімі қызметін атқарды. 2019 жылдан бастап Президент Әкімшілігінде мемлекеттік бақылау және ұйымдастыру-аумақтық жұмыстар бөлімін басқарды. 2021 жылдың сәуір айынан бастап "Қазақстан темір жолы" ұлттық компаниясының басқарма төрағасы қызметін атқарып келді.