Шалғайда орналасқан елді мекендердің интернетке қосылуы – ел үшін маңызды мәселе. Осы олқылықтың орнын толтыру мақсатында Қазақстанда «Ауыл online» жобасы жүзеге асырыла бастады. Жоба аясында алдағы екі жылда шалғай ауылдардың 90%-дан астамы интернетпен қамтамасыз етіледі, деп хабарлайды Altainews.kz тілшісі.

Бұл туралы Үкімет отырысынан кейін өткен баспасөз мәслихатында Цифрлық даму, инновациялар және аэроғарыш өнеркәсібі вице-министрі Дмитрий Мун мәлімдеді.

«Қазақтелеком» компаниясы жобаның тікелей орындаушысы. Компания басшысының міндетін атқарушы Абылайхан Оспановтың айтуынша, 3 мың ауылды жоғары жылдамдықты интернетпен қамтамасыз ету міндеті қойылған.

Жобаны табысты жүзеге асыру үшін әр облыстың әкімдерімен меморандумдар жасалады. Себебі жергілікті биліктің көмегінсіз кейбір техникалық мәселелерді шешу қиын.

«Ауыл online» – тек интернетке қосу жобасы емес, ауыл өмірін жақсартудың үлкен бір қадамы. Жоғары жылдамдықты интернет білім, медицина, мемлекеттік қызметтер мен кәсіпкерлік салаларының дамуына жол ашады. Енді еліміздің түкпір-түкпіріндегі ауыл тұрғындары да заманауи цифрлық мүмкіндіктерге қол жеткізе алады.