Шығыс Қазақстан облысының ТЖД ұйымдастыруымен спорт манежінде ерекше рухта өткен жарыс жас ұрпақтың батылдығын, төтенше жағдай кезіндегі жылдам шешім қабылдай білудегі зеректігін көрсетті. Бұл сайыс – жыл сайын дәстүрге айналып келе жатқан, «Жас құтқарушы» орталығының бұрынғы басшысы Е.Ф. Шатурныйды еске алуға арналған тағылымды шара. Құрмет пен жауапкершілік ұштасқан осы жарыста жас құтқарушылар тек бір-бірімен бақ сынасып қана қоймай, адам өмірін сақтап қалу жолындағы нағыз әрекеттерге дайын екендігін дәлелдеуге тырысты, деп хабарлайды Altainews.kz.

Жарыс кезеңдері қарапайым ойын емес — өмір сынағының шағын үлгісі. Қатысушылар алғашқы медициналық көмек көрсету, зардап шегушіні тасымалдау, өрт сөндіру эстафетасы, түрлі кедергілерден өту және төтенше жағдайлар кезіндегі мінез-құлық ережелерін іс жүзінде барынша көрсетіп бақты. Әр тапсырма – жылдамдықты ғана емес, сабырды, білімді және командалық үйлесімді талап етті.

Спорт манежіндегі атмосфера ерекше болды. Трибунадағы қолдаушылардың қуанышты үні, желбіреген командалық жалаулар, жасөспірімдердің жанкешті талпынысы — бәрі бір сәтке болса да шынайы құтқару операциясын елестетті.

ШҚО ТЖД ТЖ жою басқармасының бастығы Эльдар Шаймарданов жас қатысушылардың дайындығына жоғары баға берді.

Қызығы мен тартысы қатар өрбіген додада 13 команда бақ сынады. Жеңіс тұғырына алғаш болып №29 мектептің құтқарушы жасақтары көтеріліп, Бас жүоде иегері атанды. Ал бірінші орынға №37 және №39 мектеп командалары тең көрсеткішпен табан тірелі. Күміс жүлде №22 мектепке бұйырса, қола медаль №16 орта мектеп оқушыларына табысталды.

Бұл жарыс – жас жүректердің болашақ кәсібіне қарай нық қадам басуы. Құтқарушы болу – батылдықтың өлшемі, ал сайыс соның алғашқы баспалдағына айналды. Балалар алған білімін тәжірибеде қолдануды үйреніп қана қоймай, төтенше жағдайда өзгенің өмірін құтқаруға дайын болудың мәнін түсінді. Ең үлкен жеңіс — медаль емес, қауіпсіздік мәдениетін бойға сіңіру.

Жарысқа келген әр жас құтқарушының жүрегінде жанған алау — жақынға қол ұшын созу, өмірді сақтап қалу, елге қызмет ету. Болашақта сол алау қаншама тағдырды жарыққа бастарын кім білсін?..