Катонқарағай – биік таулары бұлтқа мінген, самалы салқын, жанға тыныштық сыйлар жерұйықтың бір бөлігі. Бұл өлкеге келген адам табиғаттың тылсымына тамсанбай кете алмайды. Соңғы жылдары ауданның ауылдық аймақтарында жаңа бастамалар жанданып, халықтың тұрмысын жақсартуға бағытталған жобалар қарқын ала бастады. Соның ішінде «Ауыл Аманаты» бағдарламасының берері мол екенін тұрғындар күн өткен сайын сезініп келеді. Әлеуметтік қолдау ауыл азаматтарының өз кәсібін ашуына мүмкіндік беруде, деп хабарлайды Altalinews.kz.

Сол игі бастаманың айқын бір дәлелі — «Ұлназ» ауылшаруашылық өндірістік кооперативінің жетекшісі Тілеубек Мұсабаев жүзеге асырған жоба. Іскер азамат 31,2 миллион теңге көлемінде жеңілдетілген несие алып, ауылдың қақ ортасынан заманауи талапқа сай мейрамхана салуды мақсат еткен еді. Бүгінде бұл арман шындыққа айналып, кең, жарық, келушілерге жайлы жаңа нысан есігін айқара ашты.

Жаңадан бой көтерген мейрамхана — тек бизнес нысаны емес. Бұл ауыл тіршілігіне жаңа дем сыйлаған, жастарға жұмыс, қонақтарға қызмет, өңірге серпін болар әлеуметтік маңызы зор орын. Туристік әлеуеті жоғары Катонқарағайға тоқтаған жолаушы енді таза ауа мен әсем тауды ғана емес, сапалы сервисті де сезіне алады. Ал жергілікті тұрғындар үшін бұл — жаңа жұмыс орындары, тұрақты табыс, ауылда қалып еңбек етуге ынталандыратын мүмкіндіктің бірі.

Бүгінде «Ауыл Аманаты» бағдарламасы Катонқарағай ауданында кәсіпкерлікке жан бітіріп, ауыл экономикасына жаңа тыныс сыйлауда. Жобалардың көбеюі — тек бизнес өркендеуі емес, адамдардың тұрмыс сапасының жақсаруы, әлеуметтік белсенділіктің артуы. Қолдаудан қанаттанған кәсіпкерлер ауылға жан бітіріп, елді мекендердің келешегін айқындауда.

Катонқарағайдың қара орманындай тамыры терең, тасқынындай қуаты мол ауыл өмірі дәл осындай шағын, бірақ маңызды қадамдармен көркейіп келеді. Жаңа мейрамхана — соның бір көрінісі, ал оның артында ауылға сенген, еңбекке арқа сүйеген адамдардың күші, ниеті, үміті бар.