ШҚО бойынша сауда және тұтынушылардың құқығын қорғау департаменті облыс тұрғындарынан қанша шағым түскенін жариялады. Былтыр департаментке қызмет көрсету және сауда саласына байланысты 563 өтініш түссе, биыл 9 айдың ішінде 425 шағым түскен.

Бұл туралы департамент басшысы Данияр Дүйсембаев Аймақтық коммуникациялар қызметінде ақпарат айтты, деп хабарлайды Altaynews тілшісі.

Ал әлеуметтік маңызы бар азық-түлік тауарларының тауарлық үстемесін шарықтату бойынша 9 тексеру жүргізіліп, оның бесеуінде ескерту берілген, ал 4 бұзушылық расталған жоқ. Ал ішкі саудадағы сөреде тауардың бағасын көрсетпеу, бағаның арасындағы сәйкессіздік бойынша 10 өтініш түскен.

Департамент тұтынушы құқығын қорғау саласында жоспардан тыс 17 тексеру жүргізіп, нәтижесінде талап бұзғандарға әкімшілік жаза қолданылып, ескерту берілді.

ШҚО бойынша Техникалық реттеу және метрология комитетінің департаменті биыл 295 кәсіпкерлік субъектісіне мемлекеттік бақылау жүргізген. Техникалық регламент талабын сақтау мәселелері бойынша жоспардан тыс 14 тексеру жүргізілді, оның 12-сінде бұзушылық анықталды. Мотор майын сатушыларға 1 млн 733 мың теңге көлемінде айыппұл салынып, талапқа сай келмейтін өнімді сатуға тыйым салынды.

Оның айтуынша, сәйкестік туралы 7 декларацияның қолданылуы тоқтатылып, өлшем бірлігін қамтамасыз ету саласында барлығы 185 субъектіде мемлекеттік бақылау жүргізілді.

Сонымен қатар, зергерлік бұйымдарды сату саласында бірыңғай сынама таңбасының, атаулы белгісінің болуына тексеру жүргізілді. Департамент 69 субьектіге сырттай бақылау жүргізген.