Шығыс Қазақстан мен АҚШ арасындағы ынтымақтастық байланыс одан ары нығая түспек. Әсіресе, медицина, жоғары білім, өнеркәсіп салаларында тәжірибе алмасудың екі жаққа да берері мол.

Бұл туралы облыс әкімі Ермек Көшербаев пен АҚШ-тың Қазақстандағы уақытша сенімді өкілі Джуди Куомен кездесуде айтылды, деп хабарлайды Altaynews.kz тілшісі.

Оның айтуынша, денсаулық сақтау саласында қазірдің өзінде елордалық университеттермен әріптестік байланыс бекіген, келешекте орталық мекемелер арқылы өңірлермен де ынтымақтастық орнатуға мүмкіндік мол.

ШҚО әкімі Америка Құрама Штаттарымен бірқатар салаларда ынтымақтастық байланысты нығайтуды жоспарлап отырғанын айтты. Бүгінгі таңда АҚШ-та онкологиялық ауруларды анықтап, емдейтін ең озық технологиялар бар. Шығыс Қазақстанда да медицина жоғары деңгейде дамып жатыр және бірнеше жылдан бері қатерлі ауруларды ерте бастан анықтайтын заманауи технологиялар қолданылуда. Өңірдің медицина мекемелерінің құрал-жабдықтары әлемдік стандарттарға сай келеді, ал дәрігерлеріміз шетелдің үздік клиникаларында біліктілігін арттыруда.   

Айта кету керек, биылғы тоғыз айда ШҚО мен АҚШ арасындағы сыртқы сауда айналымы 83,6 млн АҚШ долларын құраған.