Самар ауданының Миролюбовка ауылында оқушылар бес айдан бері дене шынықтырумен мектеп дәліздерінде  айналысуға мәжбүр.

Мердігер спортзалға төсеген еден тақтайлары шіріп, салдарынан спортзал жарамсыз болып қалды, деп хабарлайды Altaynews.kz тілшісі.

Самар ауданы әкімінің орынбасары Қайдар Сұрашевтың айтуынша, өткен жылдың көктемінде ауданның білім бөлімі «MEGA-STR»  ЖШС-мен Миролюбовка ауылындағы мектептің спорт залын ағымдағы жөндеуге келісім-шарт жасасқан.

Жоспар бойынша мердігер шілде айының соңында нысанды тапсыруы керек болатын, бірақ материалдың болмауына байланысты уақыт кестесіне сәйкес келмеді.

Самар ауданы білім бөлімінің ақпараты бойынша, жұмыс тиісті тәртіпте және белгіленген мерзімде орындалмағандықтан, мердігерге жұмыс үшін ақша төленбеген.

Мектеп директоры экономикалық сотқа аталған компанияны мемлекеттік сатып алудың жосықсыз қатысушысы деп тану туралы талап арыз берді.

Бірінші отырыста сот бұл мердігерді жосықсыз деп таныды. Алайда мердігер апелляциялық шағым бергеннен кейін, екінші сот отырысында сот олардың талаптарын қанағаттандырды.

Айжанат Бақытқызы