Жаңа Бұқтырмадағы абаттандыру бойынша жобаға қоғам белсенділері бақылау жүргізеді
Жаңа Бұқтырма кентіндегі Ұлы Отан соғысындағы жеңістің 75 жылдығына арналған ескерткіш аумағын абаттандыру бойынша жобаға мемлекеттік бюджеттен бөлінген қаражат артық па? Бұл мәселені қоғам белсенділері көтеріп отыр. "Әділдік жолы" қоғамдық бірлестігінің Шығыс Қазақстан филиалының басшысы Әділ Пішенов Facebook әлеуметтік желісіндегі парақшасында мұндағы шығын 11,6 миллиард теңгені құрағаны туралы жазған болатын, деп хабарлайды Altaynews.kz тілшісі.
Қоғам белсендісі осы мәселе бойынша облыстық әкімдікке жүгінді. Осыған байланысты аймақ билігі Жаңа Бұқтырма кентінде қоғам белсенділері мен тиісті орган өкілдерінің басын қосып, кездесу өткізді.
Аталмыш жоба Жаңа Бұқтырма кентіндегі туризмнің дамуына да өз септігін тигізеді. Себебі абаттандыру жүретін аумақта жағажайға дейін арбат салынып, субұрқақтар мен спорт алаңдары салынбақ. Екіге бөлінген жобада абаттандыруға керекті қаржы облыстық, ал инженерлік желілердің жөндеу жұмстары республикалық бюджеттен қаржыландырылады.
- Бірден облыс әкімдігіне жүгінгеніміз дұрыс болыпты. Билік жағдайды бақылауға алды. Біз халық үшін ортақ іс атқарамыз. Сондықтан барлығын сапалы әрі уақытында жасау қажет. Қоғам мен жергілікті билік арасындағы байланыс міндетті түрде болу керек, - деді Әділ Пішенов.
Қоғамдық бақылауды күшейтуге жергілікті тұрғындар да ат салыспақ. Олар осындағы 200 орындық жаңа мектептің құрылысын назарға алатындарын жеткізді.
- Жаңа мектептің құрылысы қыс мезгілінде де тоқтамағаны бізді қуантып отыр. Осы жылдың аяғына дейін мектепті салып бітіреміз дейді мердігерлер. Соған үміттенеміз, - деді кент тұрғыны Людмила Лубышева.
Айта кетейік, бұл мәселе өңір билігінің бақылауына алынды. Ал істің мән-жайы туралы қорытынды белсенділердің қатысуымен егжей-тегжейлі зерделенгеннен кейін жарияланбақ. Altaynews.kz редакциясы бұл жағдайға қатысты оқырмандарын хабардар етіп отырады.