Биыл  Шығыс Қазақстанның 13 елді мекенінде антенна-мачталық құрылғылар орнатылмақ. Бұл туралы облыс әкімі Ермек Көшербаевтың «КаР-Тел» ЖШС-ның бас атқарушы директоры Евгений Настрадинмен кездесуін барысына айтылды.

Белгілі болғандай, облыстық бюджет есебінен салынатын жаңа телекоммуникациялық мұнаралар Зайсан ауданының Жаңатұрмыс, Шілікті, Жалшы, Тарбағатай ауданының Жаңаауыл, Алтай ауданының Быково, Күршімнің Егіндібұлақ, Жолнұсқау, Үшбұлақ, Қаратоғай, Катонқарағай ауданының Топқайың, Ұланның Жоғарғы Тайынты, сондай-ақ, Шемонаиха ауданының Большая речка мен Медведка ауылдарында пайда болмақ. Оның ішіндегі төрт базалық станса халыққа «Билайн» сауда маркасымен танымал «КаР-Тел» компаниясына тиесілі болады деп жоспарлануда, деп хабарлайды Altaynews.kz тілшісі.

Облыстық цифрландыру және архивтер басқармасының мәліметі бойынша, өңірде 184 елді мекенді кезең-кезеңімен интернетпен қамтамасыз етудің жол картасы әзірленіп, бекітілген.

Аймақ басшысы Ермек Көшербаев қолдан келген көмектің бәрі көрсетілетінін жеткізді.

Айта кетейік, бүгінде Шығыс Қазақстандағы 363 елді мекеннің 179-ы мобильді интернетпен қамтамасыз етілген. 2023 жылдың басынан бері облыста барлығы 10 849 тұрғыны бар 27 елді мекенге интернет тартылса, оның тоғызында дәл осы «КаР-Тел» ЖШС-ның базалық стансасы орнатылған.

Фото: Аяужан Утеулинова