Жер сілкінісі болған жағдайда дүрбелеңді барынша азайту керек – ШҚО әкімі
Фото: instagram.com/shko.akim.official
Аймақ басшысы Ермек Көшербаев халықпен профилактикалық жұмысты күшейтуді тапсырды, деп хабарлайды Altaynews.kz тілшісі.
23 қаңтарда Алматыдағы жер сілкінісі мәселесі талқыланған Үкімет отырысынан кейін ШҚО әкімі облыстық басқармалардың басшыларымен, қалалар мен аудандардың әкімдерімен кеңес өткізді.
- Өңіріміздің бір бөлігі сейсмикалық қауіпті аймақта, соңғы он жылда жиырма жер сілкінісі болды, бақытымызға орай, жер сілкінісінің қарқындылығы алты балдан аспады және қиратулар мен адам шығыны болған жоқ. Сондықтан жер сілкінісі болған жағдайда адамдар қалай әрекет ету керектігін түсініп, дүрбелеңді азайту үшін халықпен профилактикалық жұмыстар жүргізуге ерекше назар аудару керек, - деп атап өтті Ермек Көшербаев.
Қазірдің өзінде үш ай сайын барлық ірі кәсіпорындарда, мектептерде, колледждерде және өзге де мекемелерде оқыту семинарлары, оқу-жаттығулар және басқа да іс-шаралар өткізіледі. Онда мамандар мұндай жағдайда өзін қалай ұстау керектігі, арнайы сөмкеде не болу керектігі және қандай алгоритмді басшылыққа алу қажеттігі туралы нақты және егжей-тегжейлі айтады.
- Мұндай іс-шараларды өткізу жауапкершілігі тікелей кәсіпорындар мен мекемелердің басшыларына жүктеледі. Бұл жұмысты жалғастыру қажет, - деді өңір басшысы.
Айжанат Бақытқызы
Оқи отырыңыз
