Шығыс Қазақстан облысында аймақты көршілес елдермен және ішкі көлік дәліздерімен байланыстыратын ірі логистикалық хаб құру жоспарланып отыр. Облыс әкімі Ермек Көшербаев әкімдіктің кеңейтілген отырысында ШҚО-ны мультимодальды орталыққа айналдырудың егжей-тегжейлі жоспарын бір ай ішінде әзірлеуді тапсырды, деп хабарлайды  Altainews.kz тілшісі. 

Бұл жоспар әуежайларды, шекара бекеттерін және жаңа көлік жолайрықтарын қамтуға тиіс.  

Аймақтың стратегиялық бағыттарының бірі – Риддер арқылы өтетін жолдың құрылысын салу, ол ШҚО-ны Ресей арқылы Моңғолиямен байланыстырады. Бұл жаңа экономикалық мүмкіндіктердің ашылуына және өңірдің көлік қатынасының нығаюына ықпал етеді.  

Логистикалық орталықтың құрылуы жүк тасымалы көлемін айтарлықтай арттырып, жаңа инвесторларды тартып, ШҚО-ның экспорттық әлеуетін дамытуға мүмкіндік береді.  

Айта кетейік, Үкіметтің кеңейтілген отырысында Мемлекет басшысы мультимодальды көлік тораптарын дамытуды тапсырған болатын. Бұл тораптар барлық көлік түрлерінің тасымалдарын интеграциялауға мүмкіндік береді.

Фото: Махаббат Ахметжанова