Шығыс Қазақстан облысында шағын және орта бизнесті дамыту мақсатында туристік аймақтарды абаттандыруға ерекше көңіл бөлінуге тиіс. Аймақ басшысы бұл мәселені кеңейтілген әкімдік отырысында көтеріп, инфрақұрылымды жақсарту мен халық үшін қолайлы жағдай жасау қажеттігін атап өтті.  

Облыс әкімінің айтуынша, белгілі бір орынға адамдар жиі бара бастаған кезде ол туристік аймақ ретінде қалыптасады. Сондықтан мұндай жерлерде келушілерге қолайлы жағдай жасау маңызды. Әкім туристік орындарда қауіпсіздік ережелерін де белгілеу қажет екенін айтты. 

Туристік аймақтарды дұрыс ұйымдастыру үшін мұздың қалыңдығын өлшеп, төтенше жағдайлар қызметін ескертіп, арнайы трассалар жасап, қажетті қоршаулар орнату қажет. Әкімнің айтуынша, тыйым салу ең оңай шешім болғанымен, бастысы – қауіпсіздікті қамтамасыз етіп, келеңсіз оқиғалардың алдын алу.  

Облыстағы демалыс орындары жаз мезгілінде де үлкен сұранысқа ие. Әкім халықтың жұмыстан кейін демалатын орын іздейтінін, ал қала маңында суға шомылуға болатын орындар аз екендігін тілге тиек етті. Сондықтан бұл аумақтарды ретке келтіру маңызды. Өткен жылы жақын маңдағы су айдындардың сапасы тексерілген болатын. 
Осыған байланысты әкімдікке көктемде туристік аймақ құрып, жазда іске қосу, сол жерге автобус бағыттарын көбейту, келушілерге көліктерін қоюға жағдай жасау тапсырылды.  

Облыс әкімі Шешек аумағына барып, онда тюбинг тебетін халық үшін жағдайдың жасалмағанына назар аударды. Ол жерде санитарлық-гигиеналық орындар жоқ, бұл – үлкен мәселе. 

Әкім туристік аймақтарды абаттандыру шағын және орта бизнестің дамуына мүмкіндік беретінін айтты. Оның пікірінше, қызмет көрсету сапасын жақсарту арқылы облыстағы ішкі туризмді дамытуға болады. Бұл өз кезегінде жаңа жұмыс орындарының ашылуына ықпал етіп, өңір экономикасын нығайтады.

Фото: Махаббат Ахметжанова