Шығыс Қазақстан облысында ұсақ мал басын көбейтуге және құс шаруашылығын дамытуға ерекше назар аударылады, деп хабарлайды Altainews.kz тілшісі. 

2024 жылдың қорытындысы бойынша ауыл шаруашылығының жалпы өнім көлемі 458,5 млрд теңгені құрап, өткен жылмен салыстырғанда 6,6%-ға артты. Өңір экономикасындағы ауыл шаруашылығының үлесі 49%-ға жетті. Ет пен сүт өндірісінің ұлғаюына қарамастан, ұсақ мал саны 1,7%-ға (551,6 мың бас), ал құс саны 6,4%-ға (3,5 млн бас) азайды. Қазіргі уақытта облыста екі құс фабрикасы және жеке қосалқы шаруашылықтар жұмыс істейді. 

ШҚО әкімі Ермек Көшербаев ет және құс шаруашылығы өнімдерін өңдеу жұмыстарын жандандыруды тапсырды. Қазіргі таңда өңірге бұл өнімдердің айтарлықтай бөлігі басқа облыстардан импортталады. 

ШҚО-дағы ең аз ұсақ мал басы Тарбағатай ауданында тіркелді. Аудан әкімі Дархан Жоргекбаевтың айтуынша, оның негізгі себептерінің бірі – жұмыс күшінің жетіспеушілігі. 

Өңір басшысы аудан әкімдері мен жауапты сала жетекшілеріне бір ай ішінде ұсақ мал басын көбейту және құс шаруашылығын дамыту бойынша нақты ұсыныстар дайындауды тапсырды. 

Экономиканы, соның ішінде ауыл шаруашылығын әртараптандырудың негізгі факторларының бірі – жер ресурстарын тиімді пайдалану. 2024 жылы облыста 120 мың гектар жер қайта айналымға енгізіліп, оның бір бөлігі халыққа бөлінді. 

Облыс әкімі жергілікті биліктің ауыл шаруашылығын әртараптандыру үшін барлық қажетті құралдары бар екенін атап өтті. Алайда, көптеген фермерлер шабындық және егістік жерлерді алу кезінде бюрократиялық кедергілерге тап болып отыр. 

Аудан әкімдеріне әр округтегі жағдайды бақылауда ұстау, халықпен тығыз байланыста жұмыс істеу, кооперация мүмкіндіктерін қарастыру және шаруашылықтардың дамуын қамтамасыз ету тапсырылды. 

Фото: Махаббат Ахметжанова