Жазушы Оралхан Бөкейдің «Қар қызы» драмасын қала тұрғындары тағы бір мәрте тамашалады. Бұл жолы қойылым мемлекет және қоғам қайраткері Бердібек Сапарбаевты еске алу аясында көрермен назарына ұсынылды.

Алтайдың асқақ жазушысы Оралхан Бөкейдің аңызбен астасқан драмасының астарында айтылар ақиқат көп. Шығарамдағы тағдыр шындығын актерлер қойылым кезінде шынайы көрсете білді. Қаламгердің «Қар қызы» драмасын осыған дейін режиссер Дина Жұмабай Оралхан Бөкейдің 80 жылдығы қарсаңында сахналаған болатын, деп хабарлайды Altainews.kz тілшісі. 

Қойылым домбыра сазымен басталады. Сиыршы шал сиқырлы әуен аясында Қар қызы туралы хикаятты баяндап бастайды. Қар қызы.  Ол мынау сұп-суық өлкеде сыңсытып ән салатын ару қыз ғой… Залдағы көрермендердің де Қар қызына деген ынта-ықыласы осы арадан бірден байқалады. Ары қарай көрермен қауым Қар қызымен бірге қиял әлеміне қанат қағады.

«Қар қызы» – көңіл астарындағы көп сұраққа жауап беріп, оқырманға ой салар шығарма. Ал оны театр сахнасы арқылы тамашалау тіптен ғажайып әсер сыйлайды. Көрерменнің таңғажайып әсер алып, тамсанып шыққанын қойылым соңында көрдік. 

Айта кетейік, шығарманың алғашқы нұсқасы 1977 жылы жазылыпты. Бірақ кейін қайта өңделіп, 1984 жылы «Біздің жақта қыс ұзақ» жинағында жарық көрген.

Фото: Валерий Шведов