«Пони драйвинг» - Риддерде ат спортын дамытудағы тың жоба
Шығыстың шырайлы Риддер қаласында тұратын Екатерина Худякованы жоғары медициналық білімі болса да, басқа салада бақытын тапқан жанның бірі деп айтуға толықтай негіз бар. Ол «G.HORS.RIDDER» ат-пони клубының жетекшісі, «Пони драйвинг» жобасының авторы негізінде өңірде ерекше игілікті істі қолға алған.
Бұл жоба мүмкіндігі шектеулі азаматтарға және ат спортымен айналысуға қызығушылығы бар, алайда түрлі себептерге байланысты атқа отыра алмайтындарға понидің көмегімен қорқыныштарын жеңуге мүмкіндік береді, деп хабарлайды Altainews.kz тілшісі.
Сонымен қатар былтыр ҚР Мәдениет және ақпарат министрлігі өткізген «Тәуелсіздік ұрпақтары» байқауында Шығыс Қазақстандағы ат спортын дамытуға бағытталған «Пони драйвинг» жобасы «Мәдениет» номинациясында үздік атанып, үш миллион теңгенің грантына ие болған еді. Екатерина енді алдағы уақытта өз шаруашылығын дамытуды көздеп отырғанын айтты.
Шаруашылықтағы понилар қолға үйретілген. Сондай-ақ қауіпсіздік құралдарымен де жабдықталған. Екатерина өз жобасын одан әрі дамытуды көздеп отыр екен. Жеңіп алған қаржысына қажетті құрал-жабдықтарды сатып алмақ. Оның ойынша, пони драйвингті біздің өңірде дамытудың келешегі зор. Әлеуеті де мол дейді.
Қуаныш Рахметоллаұлы
Фото: Аяужан Утеулинова