С.Аманжолов университетінің студенті Дүниежүзілік жастар фестиваліне қатысты
С.Аманжолов атындағы Шығыс Қазақстан университетінің студенті Ерболат Болатов Ресейде өткен бүкіләлемдік жастар фестиваліне қатысты. Фестивальдің басты мақсаты – бүкіл әлем жастары арасында байланыс орнату, деп хабарлайды Altainews.kz тілшісі.
- Бұл шараға мен іріктеуден кейін келдім. Үміткерлерге эссе жазып, өздері туралы бейнеролик дайындап және оқудағы жетістіктерін таныстыру қажет болды. Шараға қатысуға барлығы 300 мың өтінім түскен. Байқау өте қызықты өтті, – дейді Ерболат Болатов.
Оның айтуынша, бизнес, медиа, халықаралық ынтымақтастық, мәдениет, ғылым, білім, еріктілік және спорт саласындағы 20 мың жас көшбасшы жоғарыда аталған салалардың үздіктерімен танысуға мүмкіндік алды. Жастар үшін танымал актерлармен, спортшылармен, ғалымдармен, министрлермен және Ресей президентімен кездесулер ұйымдастырылды.
- Менің бағытым – ғылым. Семинарларда жас ғалымдар экология, ғарыш және тарих тақырыптарын көтерді. Фестиваль күндері біз көптеген шеберлік сабақтарын, концерт, спектакль және іскерлік кездесулерді тамашаладық. Алған әсерім тамаша, – деді ШҚУ студенті.
Айта кетейік, Қазақстан делегациясының құрамында 300 адам болды.
Фото: С.Аманжолов атындағы ШҚУ
Оқи отырыңыз
