Көркімен көз тартатын Шыбындыкөл енді шын мәнінде қолжетімді бола түспек. Бұған дейін ойдым-ойдым, шұрық-тесік қара жолы жеңіл көлікпен жүруге қауіпті болғандықтан, бұл табиғат кереметіне жету көпшілікке қиындық тудырып келген еді. «Шіркін, Шыбынды...» деп армандаған талай адам көлге бара алмай жүргені рас. Енді бұл мәселе шешімін тауып, Шыбындыкөлге баратын жол жөнделіп, жағасында муниципалды жағажай салынатын болды, деп хабарлайды  Altainews.kz тілшісі.

Жағалауы ақ қайың мен қалың тоғайға оранған Шыбындыкөл Өскеменнен шамамен 90 шақырым жерде, Самар тас жолының бойындағы Жоғары Тайынты ауылынан әрі қарай орналасқан. Айналасын жартасты тау жоталары қоршаған бұл көл – тұнық әрі жылы суымен, көркем табиғатымен танымал демалыс орны. Айтулы жазушылар да кеңестік кезеңде мұнда жиі келіп, тынығып қайтатын болған.

Қазіргі таңда көлдің маңында жеке меншік демалыс базасының құрылысы да жүріп жатыр. Жол инфрақұрылымы жақсарса, Шыбындыкөлдің қолжетімділігі артып, өңір туризміне серпін беретіні сөзсіз.

Ұлан ауданының әкімі Арман Бекбосыновтың айтуынша, жоба аясында бөлінетін 200 миллион теңге бюджет қаржысы тек жол жөндеуге емес, жағажайды абаттандыруға да жұмсалады. Сондай-ақ, Жоғары Тайынты ауылында туристерге арналған шағын базар ашу жоспарланып отыр.

Қаржыландырылатын өзге бес жоба Шемонайха, Тарбағатай, Марқакөл, Алтай аудандары мен Риддер қаласындағы демалыс нысандарының инфрақұрылымын жақсартуға бағытталған.

Фото: Altainews.kz