Тарбағатайда 60 шақырымға жуық жол жаңартылды
Фото: depositphotos.com
Тарбағатай ауданында соңғы жылдары жол жөндеу жұмыстары жоспарлы түрде жүзеге асып келеді. Аудан әкімінің орынбасары Марат Қызовтың айтуынша, 2023 жылы округ орталықтарына апаратын жолдар толықтай асфальтпен қамтылған. Енді спутниктік ауылдарға баратын жолдар мен ауыл ішіндегі көшелерге кезек келді, деп хабарлайды Altainews.kz тілшісі.
– «Былтыр облыстық және аудандық маңызы бар жолдар, сондай-ақ ауыл ішіндегі көшелер бойынша 60 шақырымға жуық жолға орташа жөндеу жұмыстары жүргізілді», – деді аудан әкімінің орынбасары.
2024 жылы облыстық маңызы бар үш жол учаскесі – Маңырақ–Бозша, Қарасу–Ақмектеп және Ақжар–29 бағыттарындағы 45 шақырым жол орташа жөндеуден өтті. Сонымен қатар былтыр Ақжар ауылындағы 4 көшеге 2,5 км асфальт төселсе, биыл Ақжар, Тұғыл, Маңырақ, Жетіарал ауылдарындағы 11 көшеге 9,1 км жол жаңартылған.
– 2025 жылы «Ауыл – Ел бесігі» бағдарламасы аясында Бозша, Қабанбай, Жаңалық ауылдарына апаратын жолдар жөнделеді. Жобаларға 371,2 млн теңге бөлінген. Бұған қоса, Ақжар ауылындағы ұзындығы 1,6 шақырым асфальт төселмек. Бұл – аудан тарихында жол жөндеуге жергілікті бюджеттен қаржы бөлініп отырған алғашқы жоба. Құны – 138,5 млн теңге. Бұдан бөлек, Бозша ауылына кіреберіс көпірді жөндеуге 15,7 млн теңге қарастырылған. Қарасу, Құйған, Байтоғас, Жаңаауыл ауылдарының орталық көшелерін жөндеуге арналған жобалар да дайындалып, сараптамадан өткен. Бұл жұмыстарға 520,9 млн теңге қажет, - деді аудан әкімі орынбасары.
Оқи отырыңыз
