Шығыс Қазақстан облысында жаңа оқу жылы қарсаңында «AMANAT» партиясының «Бақытты отбасы» жобасы аясында дәстүрлі «Баланы мектепке дайындайық» акциясы өтіп жатыр. Игі бастаманың мақсаты – әлеуметтік жағынан осал санаттағы отбасылардың балаларына қолдау көрсетіп, оларды мектепке дайындау, деп хабарлайды Altainews.kz тілшісі.

«Күн сайын облыстың аймақтық және аумақтық филиалдарында балаларға мектеп сөмкелері мен оқу құралдары табысталуда. Қазіргі уақытта 800-ден астам оқушы көмек алды. Жалпы, акция аясында 1500-ден астам баланы қажетті құрал-жабдықтармен қамту жоспарланып отыр», – деді «AMANAT» партиясы ШҚО филиалы атқарушы хатшысының орынбасары Аманбай Нұркенов.

Акцияға барлық деңгейдегі депутаттар, бастауыш партия ұйымдары, кәсіпкерлер және өңірдегі ірі кәсіпорындар атсалысуда. Бүгінде тартылған қаражат көлемі 16 миллион теңгеден асты.

Акция тамыз айының соңына дейін жалғасады. Осы кезеңде «AMANAT» партиясының облыстық және аумақтық филиалдары балаларға оқу құралдарымен толықтырылған сөмкелерді табыс етуді жалғастырады.
Бұл бастама – партияның әлеуметтік әділетті қоғам құруға бағытталған нақты қадамдарының бірі.