Соңғы бір апта жауған қар жалпақ жұртты әбігерге салды. Еліміздің көптеген өңірлерінде жолдар жабылып, оқу онлайнға көшті. Ал бұған дейін ШҚО-ның Марқакөл өңірінде 2 метрден астам қар жауып, табиғи сипаттағы төтенше жағдай жарияланған болатын.

Бұл жолы жаппай жауған қардың кесірінен облыстың көптеген өңірлерінде жолдар жабылды. Қалаға жақын Бозанбай ауылында да қарлы боран бұрқап тұрған көрінеді. Тұрғындардың әлеуметтік желіге жүктеген видеосында ауыл тұрғындарының есіктерін әрең ашып, қарды тесіп сыртқа шыққанын көруге болады, деп хабарлайды Altainews.kz тілшісі.

Бейнежазбада қардың шектен тыс жауғаны байқалады. Алайда бұл желдің өтінде орналасқан кейбір үйлерде болған жағдай көрінеді. Десе де ауыл ішінде қар көп екендігін айтады ауыл тұрғындары.