Дәрігерлері жүктіліктің 25-ші аптасында жүріп денесінің 70%-ын күйік шалған 20 жастағы Диана Долгованың өмірін сақтап қалды, деп хабарлайды Altainews.kz тілшісі.

Мамандардың жоғары кәсіби біліктілігі зардап шеккен әйелдің өмірін сақтап қана қоймай, салмағы 2,2 келі, бойы 50 см, дені сау баланың өмірге келуіне мүмкіндік берді.

Бородино ауылынан Алтайдағы ауданаралық ауруханаға жедел жәрдем көлігімен жеткізілген жүкті әйелге бірден реаниматологтар, травмотологтар және гинекологтар көмек көрсеткен. Басын, мойнын, кеудесін және аяқ-қолдарын бірінші, екінші және үшінші дәрежедегі күйік шалған науқастың жағдайын дәрігерлер ауыр деп бағалады.

Облыстық орталық мамандарының консилиумынан кейін тікұшақ жіберуге шешім қабылданып, ауданға құрамында облыстың бас реаниматологы Галина Семенова, фельдшер Назым Бейсенбаева бар бригада ұшып жетті. Зардап шеккен әйел Шығыс Қазақстан облыстық мамандандырылған медицина орталығына жеткізілді.

Диана мен оның баласының өмірі үшін өңірлік және республикалық дәрігерлердің мультитәртіптік бригадасы күресті. Бөлімшедегі дәрігер-реаниматолог-анестезиолог Александр Нарейко мен оның әріптестері науқастың өмірін сақтап қалу үшін бар күшін салды. Денсаулық сақтау министрлігінің мамандары да медициналық көмек көрсету үдерісін үйлестіріп отырды.

Диана интенсивті терапияға шыдап, ерлік танытты, теріні ауыстырып салу бойынша бірнеше отадан өтті. Жарасын ОММО травматология бөлімшесінің меңгерушісі Рафаэль Гафуровтың өзі таңды. Бала мен ананың жағдайын облыстың штаттан тыс бас гинекологы Марат Көксегенов тұрақты қадағалап отырды.