Әлеуметтік желіде Семейдегі түрмеден бірнеше қаруланған «зектің» қашып кеткені туралы ақпарат таралды. «Семей қаласы, 35-колония, қаруланған зектер түрмеден қашқан. Семей, Дмитриевка, Бородулиха, Жезкентте іздеу күшейтілді. 100% информация», – делінген онда, деп хабарлайды Аltaynews тілшісі baigenews.kz сайтына сілтеме беріп.

Аталған ақпаратқа байланысты ШҚО Полиция департаменті қысқа түсініктеме берді: «Бұл ақпарат шындыққа жанаспайды».

Сондай-ақ аталмыш мекеме жалған ақпарат таратқан адамдарға ҚР Қылмыстық кодексінің 274-бабы бойынша үш мың айлық есептік көрсеткіш мөлшерінде айыппұл салынатынын немесе үш жыл мөлшерінде бас бостандығы шектелетінін ескертті.

Айта кетейік, Семейдегі 35-колония (ОВ-156/15) – қатаң тәртіптегі түзету мекемесі. Бірнеше жыл бұрын ондағы жазасын өтеушілерден түрме қызметкерлерінің өздерін азаптайтыны туралы бұқаралық ақпарат құралы өкілдеріне шағым түскен болатын.