ШҚО бойынша Қылмыстық атқару жүйесі департаментіне қарасты ОВ-156/22 мекемесінде қарттар күні аталып өтті. Жыл сайынғы дәстүр бойынша, мекеме қызметкерлері еңбегі сіңген қарияларды құттықтады, деп хабарлайды Алтайньюс тілшісі.

Концерт барысында мекеме бастығы, әділет майоры Саят Алтаев құттықтау сөз сөйледі.

– Үлкенді сыйлау мен оларға құрмет көрсету – ата-бабадан келе жатқан салтымыз. Сіздердің өмірлік тәжірибелеріңіз бен ақыл-кеңестеріңіз, тағылымдарыңыздың біз үшін орны бөлек. Себебі, әрқайсыңыздың мекемеге қосқан үлесіңіз бен еңбегіңіз ерен. Талай жасты тәрбиелеп, ізбасарларыңызды өсірдіңіздер. Бүгін, еңбектеріңіздің зейнетін көріп отырған шақта да Сіздер ұрпақтарыңызға игілік пен ізгіліктің, пайым-парасаттың үлгісін танытудан жалыққан емессіздер, – деді ол.

Мекеме қызметкерлері өздері тарапынан концерттік бағдарлама ұйымдастырып, жыл көлемінде мекемеде өтетін түрлі іс-шараларға белсенді қатысатын қарияларды мадақтамамен марапаттады. Қариялар әріптестерін көріп, әңгімелесіп, өздеріне арналған концерттік бағдарламаны тамашалап, марқайып қайтатындарын айтып, жас буынға батасын берді.