Қаржылық мониторинг органдарының құрылғанына төрт жыл толуына орай Қазақстан Республикасы Қаржылық мониторинг агенттігінің Шығыс Қазақстан облысындағы экономикалық тергеп-тексеру департаменті шайбалы хоккейден жолдастық турнир ұйымдастырды. Бұл шараға Өскеменнің «Торпедо» хоккей клубының 7-9 жас аралығындағы спортшылары қатысты, деп хабарлайды Altainews.kz.

Үш күнге созылған жарыс тартысты ойындармен есте қалды. Жас хоккейшілер өздерінің ерік-жігерін, шеберлігін және жеңіске деген құлшынысын көрсетті.

Турнир жеңімпаздары мен жүлдегерлеріне «Pro Hokei Ligasy» тарапынан бағалы сыйлықтар табысталды. Сонымен қатар әр матчтың алдында LED-экрандар арқылы экономикалық құқық бұзушылықтардың алдын алуға бағытталған бейнероликтер көрсетілді. Шара аясында еріктілер қаржы пирамидалары, лудомания және қаржылық сауаттылық негіздері туралы түсініктемелер жазылған үнпарақтар мен кітапшалар таратты.

Айта кетейік, 28 қаңтар – қаржылық мониторинг органдарының кәсіби мерекесі. Бұл мемлекеттік орган 2021 жылдың 28 қаңтарында Қазақстан Республикасы Президентінің арнайы Жарлығымен құрылған және тікелей Президентке бағынады.

Қаржылық мониторинг агенттігінің өңірлік экономикалық тергеп-тексеру департаменті экономикалық қауіпсіздікті қамтамасыз етіп, азаматтар мен кәсіпкерлердің мүдделерін қорғайды. Оның негізгі міндеттеріне жалған кәсіпкерлік, салық төлеуден жалтару, жалған ақша жасау, экономикалық контрабанда, бюджет қаражатын жымқыру, сондай-ақ заңсыз мұнай және алкоголь айналымы, қаржы пирамидалары, банкроттық сияқты құқық бұзушылықтарға қарсы күрес жатады.

Арайлым Орсаринова
Фото: Нелли Петенёва