Облыс әкімі Даниал Ахметов іссапары барысында Ақсуат ауылында құрылысы аяқталған орталық стадион жұмысымен танысты, деп хабарлайды Алтайньюс тілшісі.

Көгалдандырылып, қайта жарықтанған стадионды жөндеуге жалпы сомасы 75 млн. 583 408 теңге бюджет қаражаты қарастырылған. Стадионда 1800 орын жаңартылып, субұрқақ орнатылған.

– Ауданда соңғы уақытта спорт түрлерін дамытуды қолға алып жатырмыз. Спорт секциялары жұмыс істеп тұр. Кешкілік уақытта стадионымыз халыққа лық толады. Нысан есігі спортпен айналысамын деушілерге қашан да ашық. Көпшілікке ыңғайлы болуы үшін душ қабылдайтын, киім ауыстыратын бөлмелерін жасадық. Волейбол спортының түрін дамытуды жақсылап қолға алудамыз, – деді аудандық денешынықтыру және спорт бөлімінің басшысы Сержан Омарғазин.

– Аудан басшылығының спортшыларды даярлауға көңіл аударғанын байқап отырмын. Стадион өте жақсы салынған екен. Ендігі кезекте спорттың жеңіл атлетика түрлеріне көбірек көңіл аударуларыңыз қажет. «Алтай» волейбол құрамасының екінші командасында бұл ауданнан бір жас қызымыз ойнап жүр. Бұдан басқа, аудан құрамасында да бойшаң қыздардың бар екенін білемін. Сол себепті осы салаға көбірек көңіл бөліңіздер. Қажет болса жақсы бапкер шақыртыңыздар. Оған пәтер бөлейік, - деді облыс әкімі.