Алакөлдегі Үржар және Үшарал қалалары әуежайларының ұшу-қону жолақтарында жөндеу жұмыстары жалғасып жатыр.

Алматы облысы жолаушылар көлігі және автомобиль жолдары басқармасының мәліметінше, 2022 жылғы 25 мамырдағы жағдай бойынша Үшарал әуежайының ұшу-қону жолағындағы құрылыс-монтаждау жұмыстары 75 пайызға орындалған. Нысанды пайдалануға беру осы жылдың III тоқсанының басына жоспарланып отыр.

"Бүгінде бейнебақылау, сыртқы жарықтандыру және электрмен жабдықтау желілерін тарту жұмыстары жүргізіліп жатыр. Сондай-ақ, РД-5 және РД-6 (РД - рульдеу жолы) негіздері және периметрлік қоршау бағаналары орнатылып жатыр. Осы жылдың 15 мамырынан бастап бетоннан ұшу-қону жолағы жабынының жоғарғы қабатын орнату жұмыстары басталды", - делінген хабарламада.

Үржар әуежайына келетін болсақ, ұшу-қону жолағын жөндеу және іске қосу 2022 жылдың 15 маусымынан 2022 жылдың 1 шілдесіне дейінгі кезеңге жоспарланған. Шығыс Қазақстан облысының жолаушылар көлігі және автомобиль жолдары басқармасының мәліметінше, әуе айлағын сертификаттау қорытындысы бойынша әуе айлағы рейстерді қабылдай алады.