Бұған дейін де хабарлағанымыздай, өңірде күн райы күрт бұзылды. Қапалақтап жауған қар қайсыбір аудандарда ақ түтек боранға ұласты. Құтқарушылар мен полиция қызметкерлерінің ескертуіне қарамастан жолға шыққан жүргізушілер қауіпсіздік ережесіне де бейжай қарайтын көрінеді.   

Глубокое ауданындағы Секисовка мен Быструха ауылдарының арасындағы тас жолда болған жол апаты адам өміріне қауіп төндірді, деп хабарлайды Altainews.kz тілшісі.

Оқиға орнына жедел жеткен келген облыстық төтенше жағдайлар департаментінің құтқарушылары гидравликалық құрал арқылы ғана көліктің шанағын ашып, жүргізушіні алып шығып, жедел жәрдем қызметкерлеріне табыстады.

Қазгидромет күн райына байланысты ескерту жариялағанын тағы да естеріңізге саламыз. 9-10 ақпанда қарлы жаңбыр жауып, көктайғақ болады, жел екпіні күшейеді.

Көлік жолдарына қатысты ақпаратты «Дәрмен» мобильді қосымшасынан көруге болады. Сондай-ақ республикалық маңызы бар жолдар туралы ақпаратты 26-28-08, облыстық маңызы бар жолдар туралы ақпаратты 57-42-52 телефондары арқылы нақтылауға болады.