Ақпанның 17-сі күні Алтай ауданындағы таулы аймақта өздігінен қар көшкіні түсіп, Селезневка және Бұқтырма станцияларында Зырян-Защита жолаушылар пойызы кідірді.

Пойызда барлығы 185 адам болған, деп хабарлайды Altaynews.kz тілшісі.

Бұқтырма станциясында жолаушыларға ыстық шай беріліп, вагондарды жылыту үшін 11 қап көмір тиелді. Сонымен қатар теміржол көлігі ауызсумен, тамақпен және басқа да қажетті заттармен қамтамасыз етілді.

Темір жолды қардан тазалау жұмысы дереу қолға алынып, көп ұзамай үш вагон тіркеген 641-ші жолаушылар пойызы сағат 10:15 шамасында Бұқтырма станциясынан жүріп кеткен.

Қазір жолаушылар "Алтай" станциясына аман-есен жетті. Бұл жерде автобус қозғалысы ұйымдастырылған. 

Айта кетейік, тәулік бойы тоқтаусыз жауған қардан кейін Шығыс өңірінде қатты аяз түсті. Бүгін таңертең Алтай ауданында ауа температурасы -40 градусты көрсетті.