Көңілге шуақ шашар көктем мерекесін көпшілік жұрттың қуана қарсы алуы заңдылық. Әсіресе, сұлулыққа жаны құштар әйелдер қауымы асыға күтеді. Өйткені көктем Халықаралық әйелдер күнін ала келеді. Осы мерекеге орай биылғы көктемді өскемендіктер ерекше көрмемен қарсы алды.

Шығыс Қазақстан облыстық сәулет-этнографиялық және табиғи-ландшафтық музей-қорығының көрме залында Халықаралық әйелдер күніне арналған көрме ашылды. Облысымыздағы қолөнер шеберлерінің шығармашылығын арқау еткене көрмеде көз қуантар дүние көп. Ұлттық құндылықтарды ұлықтайтын бұйымдардың да қатары көп, деп хабарлайды Altainews.kz тілшісі.

Аталған көрмеге Өскеменмен қатар Алтай, Шемонаиха қалаларынан және Ұлан, Катонқарағай, Тарбағатай, Зайсан, Самар, Күршім, Глубокое аудандарынан келіп қатысқан шеберлердің бұйымдары қойылған. Әсіресе, көрме залында өнерге деген көзқарасы өзгеше жас шеберлердің болғаны көпшілікті қуантты. Өйткені өркениет көші ұлттық құндылықты ұмыттырып бара жатқандығы жасырын емес. Сондықтан да қолөнерді дәріптеп, оны дамытудың және насихаттаудың маңызы зор.

Көрменің ашылу салтанатына көрнекті өнер өкілдері мен шығармашыл жастар қатысып, әртараптан жиналған көпшілік қауым тамашалады. Бұл жолы өз бұйымдарын көрмеге шығарған шеберлердің де қатары көп болды. Ағаштан жасалған кәдесыйлардың барлығы да мереке қарсаңында таптырмас сыйлық екені көрініп тұр. Тек, өнердің құндылығы мен құнын білсеңіз болғаны. Әсіресе ұлттық киім үлгісін насихаттауға арналып жасалған жастықтарды жұрт қызыға тамашалады. Әр жастыққа ұлттық киім киген жастардың суреті салыныпты.

Көрменің ашылу салтанаты мерекелік концертпен басталып, көрмені тамашалауға ұласты. Іс-шара барысында әртүрлі ұлт өкілдерінің киім үлгілерін насихаттау шеруі өтіп, бірқатар музей қызметкерлері және шеберлер марапатталды.

Осылай көктем мерекесі қарсаңында көпшілік қолөнер көрмесін тамашалап, нәзік жандыларға кәдесыйлар алып қайтты.