Алтайда үй ауласына қасқыр кіріп кетті
шартты сурет: depositphotos.com
Алтай ауданындағы Быково елді мекенінің тұрғынына өз үйінің ауласында қасқыр шапқан. Бұл жөнінде аудан әкімдігі инстаграм әлеуметтік желісіндегі парақшасында жазды, деп хабарлайды Altainews.kz тілшісі.
Оқиға 28 сәуірде болған. Жыртқыш аң аулаға дейін кіріп үй иесіне тап берген. Артынша екі итті жарақаттап, қашып кеткен көрінеді. Үй иесі аман-есен.
Осыдан кейін ауылдықтар ит-құстың ізіне түсіп, көзін құртыпты. Аудан әкімдігінің өкілдері қасқырдың үйірі болуы мүмкін деп қауіптеніп, 29 сәуірде Төменгі Быководағы оқушылардың сабағын қашықтықтан оқыту форматына ауыстырған.
– Жергілікті атқарушы органдар, ветеринарлық қызмет және санитарлық-эпидемиологиялық қызмет өкілдері бірлесіп әрекет етті. Тұрғындар арасында ауыр зардап шеккендер жоқ, сондай-ақ мал шығыны да болған жоқ. Быково ауылының тұрғынынан талдаулар алынып, сараптамаға жіберілді, – деп мәлімдеді аудан әкімдігінің өкілдері.
Қазір аталмыш ауылда жағдай тұрақты және балалар штаттық режимде оқып жатыр.
Оқи отырыңыз
