Тегін дәрі-дәрмек үшін бірыңғай қысқа нөмір іске қосылды
Тегін-дәрмекке қатысты сауалдар бойынша «1439» бірыңғай қысқа нөмірі іске қосылды, деп хабарлайды Алтайньюс тілшісі.
Байланыс орталығының операторлары амбулаторлық ем алатындарға тегін босатылатын дәрі-дәрмектердің жеткізу мерзімі, көлемі және жоспарланған күні туралы толық ақпарат береді.
«СҚ-Фармация» ЖШС басқарма төрағасының міндетін атқарушы Берік Шәріптің айтуынша, аталмыш байланыс қызметі дәрі жеткізу жөнінде халықты хабардар етумен қатар препараттардың не себепті кешіктірілетінін де түсіндіреді.
Сондай-ақ, бірыңғай дистрибьютордың сайтында келер жылы 1 қаңтардан бастап дәрі-дәрмектің емханаларда бар-жоғы туралы ақпарат беретін электрондық анықтамалық іске қосылмақ.
Бұл анықтама арқылы емделушілерге онлайн режимде дәрілік қамтамасыз ету бойынша барлық деректер қолжетімді болады: қандай дәрі-дәрмекке қай медициналық мекемеден өтінім берілген, онда қашан және қандай көлемде дәрілер түскен, олардың қазіргі уақытта бар не жоқ екенін, дәрі-дәрмектің келесі жеткізу мерзімі қашан және т.с.с. деректер.