Баласына екпе салдырудан бас тартқандар айыппұл төлеуі мүмкін. Денсаулық сақтау министрі Елжан Біртанов «бұл өзгеріс денсаулық сақтау кодексіне де енуі мүмкін» деп отыр.

Биыл елімізде 500-ден астам екпеден бас тарту жағдайы тіркелген екен. Соның біразы адамдардың діни көзқарасына байланысты болған.

Ал жыл сайын инфекциялық ауруларға қарсы елімізде 5 миллионнан астам адамға екпе салынады. Соның 1,3 миллионы – балалар.

– Бізде екпеден бас тартатын адамдар кездесіп жатады. Сондықтан жағдайды реттеу үшін өзге елдің тәжірибелеріне жүгініп көрдік. Мәселен, Германияда екпе салынбаған балалар мектепке кіргізілмейді екен, – деді Елжан Біртанов. - Десе де, біз әзірге ешқандай шешім қабылдамадық. Бұл мәселені әлі де нақтылап ойласамыз.