Өскемендегі үй аулалары заманауи спорт және балаларға арналған ойын алаңдарымен жабдықталып жатыр. Оларға асфальт орнына қауіпсіз болуы үшін жұмсақ төсеме жайылған. Осындай бір алаңның ашылуына аймақ басшысы Даниал Ахметов қатысқан болатын, деп хабарлайды Алтайньюс тілшісі.

Мәселен, Сәтпаев даңғылы бойындағы 36/1 және 36/2 үйлердің ауласы жөндеуден өтті. Алаңға жұмсақ төсеме төселіп, көлік тұрақтары жөнделді. Жол кеңейтіліп, жиектері жаңартылды. Қалдықтарды түріне қарай бөліп салатын жәшіктер қойылды.

– 12 ықшамдаудандағы аулаларды абаттандыруға 1 миллиард теңге қаражат жұмсалды. Бұл іс келер жылы да жалғасады. Өскемен мен Семейге миллиард теңгеден қаражат бөлеміз. Одан кейін Аягөз, Зырян, Риддер сынды шағын қалаларды жабдықтаймыз, – деді облыс әкімі Даниал Ахметов.

Мұндай тамаша ауланың жұрт көңілінен шыққаны даусыз. Ақжарма тілектерін айтып жатты тұрғындар.

– Өте қуаныштымыз, көрер көзге көркем, әмбе пайдалы дүние, – дейді Айнұр есімді қала тұрғыны.

Иә, тұрғындардың қуанышы мұндай болғанда, балалардың жайын айтпасақ та болады. Шат-шадыман күлкілер естіледі.

Салтанатты ашылу шарасы барысында тұрғындарға арнап концерт те қойылды.