Шығыс Қазақстанда биылдан бастап асқақ армандарына қанат қаққалы отырған жас азаматтарға қолдау білдіру үшін «ZHAS PROJEСT» жастар корпусын дамыту жобасы өз жұмысын бастаған болатын. Қазіргі таңда бұл пилоттық бағдарламада көптеген жастар жеңімпаз атанып, өздерінің шағын кәсіптерін бастағалы жатыр.

Осы ретте, оларға жол сілтеп, дұрыс бағыт-бағдар беру мақсатында төрт күн бойы қаламыздағы Абай атындағы әмбебап кітапханасы мен «Семей» қонақ үйінде жеңімпаздарға арналған семинар-тренинг өтті.

Тренинг барысында 1 млн. теңгені тиімді игерудің жолдары көрсетіліп, жауапты шешімдердің әрдайым дұрыс қабылдануы керектігі туралы айтылып, жауапкершіліктің маңыздылығы түсіндірілді.

Айта кетейік , дәл осы жобаға Семей қаласынан 14 және 29 жасқа дейінгі 300-ге жуық азамат қатысуға өтініш білдірген екен. Олардың арасынан 64 әлеуметтік жоба таңдап алынып, тек 20-сы ғана барлық кезеңнен мүдірмей өтіп, әрбір топ 1 миллион теңге гранттың иегері атанды.

Сондай-ақ, 1 000 000 теңге ақшадан бөлек, әр топтың мүшесі ай сайын арнайы шәкіртақыларға да ие болды. ЖОО-ның түлектері - 60 000 теңге, қалған қатысушылар – 40 000 теңге алады.

Көбісінің қолға алған жұмыстары өте қызықты. Бірі мектеп оқушыларың ағылшын тіліне баулып, сонымен қатар егде жастағы қарттарға компьютер дағдыларын тегін оқытса, енді бірі мүмкіндігі шектеулі адамдарға қолөнер бұйымдарын жасауды үйретпек.