Өскемендегі қоғамдық кеңес мүшелері жүргізушілерге қолайсыздық тудыратын бірнеше трамвай аялдамаларын «көшіру» туралы ұсыныс жасады. Бұл туралы қалалық қоғамдық кеңестің әлеуметтік желідегі парақшасына жазды олар.

Сондай аялдамалардың бірі – «Тамирлан» сауда үйі аялдамасы. Оны «Даниель» сауда үйіне қарай жылжытса деген ұсыныс бар.

– Бұл аялдаманың орнын сөзсіз ауыстыру керек. Өйткені ол онысыз да көлік кептелісі көп қиылыста орналасқан. Осының салдарынан апаттық жағдайдың туындауы ғажап емес. Бірақ «көшіру» жұмысы осы аудандағы жер үсті өткелінің құрылысы біткен соң ғана мүмкін болады,– дейді қоғамдық кеңес өкілі Димитрий Литвинов.

Сондай-ақ «Хлебзавод» және «Металлургтер мәдениет үйі» аялдамаларын да Ворошилов-Гоголь қиылысынан әрі 50 метрге жылжыту туралы ұсыныс тасталды. Ал «Казгипроцветмет» аялдамасын бұрынғы БСМП ғимаратының бұрышына қарай апарса деген тілек бар тұрғындардан.