Орман шаруашылығы және жануарлар дүниесі комитеті баспасөз қызметінің мәліметінше, маусым айының соңынан бастап ҚР Үкіметінің бұйрығымен жаңа табиғи парк құрылды, деп хабарлайды Алтайнюс тілшісі.

Ол – Үржар ауданының аумағындағы «Тарбағатай» ұлттық табиғи паркі. Тұмса табиғаты тұнық су жаңа қорықтың жалпы көлемі – 143550,5 гектар.

Айта кетейік, елімізде барлығы 10 қорық бар. Екеуі еліміздің шығыс өңірінде орналасқан.  Олар – Марқакөл және Батыс Алтай қорығы.

Марқакөл қорығы – Жүсіпбекше айтсақ, қарт Алтайдың қақ басында, алақанның аясында, бал татыған айна сулы, түрі де аспан, сыры да аспан,  шарап сулы Марқакөлдің шегінде орналасқан. Көлемі – 75 мың гектар.

Батыс Алтай қорығы – Риддер және Зырян ауданындарының таулы-орманды жерлерін алып жатыр. Алтайдың аса бай флорасы мен фаунасын басып жатқан бұл қорықтың көлемі – 56 мың гектар.

Ал ұлттық парктер елімізде бесеу. Олар Алматы, Павлодар, Қарағанды, Көкшетау өңірлерінде орналасқан. Шығыс Қазақстан облысындағы Катонқарағай ұлттық  паркін білмейтін адам жоқ шығар. Алып парктің аумағы – 643 мың гектар. Иә, енді осы қатарға «Тарбағатай» ұлттық табиғи паркі қосылып отыр.