Глубокое ауданындағы Верхберезовка ауылында спорт кешені пайдалануға берілді. «Элхон» жауапкершілігі шектеулі серіктестігінің құрылысшылары өздеріне жүктелген тапсырманы қысқа мерзім аралығында орындап шықты, деп хабарлайды Аltaynews.kz тілшісі.

– Келесі жылы біздің ауылдағы техникалық колледждің спорт залына ағымдағы жөндеу жұмыстарын жүргізуді жоспарлап отырмыз, – дейді Верхберезовка ауылдық округінің әкімі Қайырхан Байғұндинов.

Сондай-ақ, Белоусовка кентінде бизнестің әлеуметтік жауапкершілігі аясында «Востокоблгаз» жауапкершілігі шектеулі серіктестігінің директоры Виктор Леонтьев хоккей қорапшасын салуға 4,5 млн. теңге бөлді. Оның бұл бастамасын кен байыту фабрикасының, «Шахтастрой» акционерлік қоғамының басшылары да қолдады.

Арнайы бөлінген бригадалар иен жатқан жердегі үйілген қоқыстарды тазалап, тегістеп, ойын алаңына айналдырды. Хоккей қорапшасын орнатып берді.

Белоусовка кентіндегі жеткіншектер мен жастардың осы мұз айдынды алаңда жаттығуларына, командалық жарыстар өткізулеріне қолайлы жағдай жасалды.