ШҚО мамандары өкпе обырын ерте анықтаудың жолын ұсынды
Облыстың онкологтары өкпе обырын ерте анықтау мақсатында елімізде кеуде қуысының төмен дозалы компьютерлік томографиясын тәуекел тобындағылар үшін скринингтік зерттеу ретінде енгізуді ұсынады. Облыстық көпсалалы онкология және хирургия орталығында өкпе обырын ерте анықтауға арналған тұрақты медициналық тексерулер мен скринингтің маңыздылығы туралы айтып берді, деп хабарлайды Altainews.kz тілшісі.
Қатерлі ісікті ерте анықтау ем-домның тиімділігіне және обырдан болатын өлім-жітімнің төмендеуіне ықпал етеді. Елімізде өкпе дертін анықтау үшін жылына бір рет флюорографиядан өту, тұрақты медициналық тексерулер мен скринингтік зерттеулер жүргізіледі. Алайда тұрақты медициналық тексерулермен тек жұмыс істейтіндер ғана қамтылған. Ал жұмыссыздар, өзін-өзі қамтитындар ешқандай тексеруден өтпейді.
2008 жылы біздің облыста бұл тәсіл қанатқақты жоба ретінде енгізілгенін айта кеткен жөн. Ол кезде жобаға алты жүзден астам адам қатысып, олардың он пайызында өкпе обыры алғашқы сатысында анықталған болатын.
Естеріңізге сала кетейік, 1 және 2 тамызда сағат 08.00- 13.00 аралығында Шығыс Қазақстан облыстық көпсалалы онкология және хирургия орталығында өкпенің қатерлі ісігін ерте анықтау және алдын алу бойынша кезекті ашық есік күні өтеді.
Мекенжайы: Өскемен қ., Потанин к-сі, 6, 1-корпус, консультациялық-диагностикалық бөлімше (емхана).
Байланыс нөмірлері: +7(7232) 48-91-51, +7 778 003-78-45.