Шығыс Қазақстанда халықаралық мұражай күніне орай дәстүрлі «Мұражайдағы түн» акциясы ұйымдастырылады, деп хабарлайды Аltaynews.kz тілшісі облыстық мәдениет басқармасының мәліметіне сүйеніп.
«Мұражайдағы түн» шарасының аясында облыстағы бірнеше мұражайда ( облыстық тарихи-өлкетану мұражайы, Семейдегі облыстық тарихи-өлкетану мұражайы, облыстық сәулет-этнографиялық және табиғат-ландшафты мұражай-қорығы, облыстық Невзоровтар отбасы атындағы көркемөнер мұражайы, Ф.М.Достоевскийдің әдеби-мемориалды мұражайы) келушілер үшін арнайы бағдарламалар әзірленіп жатыр.
«18 мамырда мұражайлар 23.00-ге дейін жұмыс істейді. Бағдарламада ескі билер балы, театрландырылған көріністер, отты думан, байкерлер парады мен көлеңкелер шоуы, флеш-мобтар бар. Сонымен қатар түнгі кинозал жұмыс істейді, спектакльдер қойылады», - деп атап өтті облыстық мәдениет басқармасының қызметкерлері.