Өскемендегі «Үміт» балалар үйінде Шығыс Қазақстан мен Павлодар облыстарының білім басшылары Ахметова Мәдениет Медеуханқызы мен Бексейітова Бақыт Мақанқызы ынтымақтастық туралы меморандумға қол қойды, деп хабарлайды Аltaynews.kz тілшісі.
ШҚО білім басқармасы басшысының баспасөз хатшысы Жанболат Санияздың берген мәліметтері бойынша, ағымдағы жылы мұғалімдердің біліктіліктерін арттыру мен дарынды балаларға арналған мамандандырылған мектептерде тәжірибе алмасу бойынша жұмыстар атқарылады.
Балалар мен жасөспірімдер клубының тәрбиеленушілері арасында фестиваль ұйымдастырылады. Қазақстан-Норвегия ынтымақтастық жобасы шеңберінде семинар өткізіліп, бұдан басқа да білім сапасын арттыруға бағытталған келісімдегі жұмыстар бірігіп атқарылмақ.
Екі жақты келісімнен кейін білім саласының мамандарына «Үміт» балалар үйінің өнерпаз ұл-қыздары өз өнерлерін көрсетті. Дөңгелене би билеп, патриоттық өлеңдерін орындаған тәрбиеленушілерге павлодарлық қонақтар естелік ретінде, Баянауыл жерінен сыр шерткен суретке толы кітапшаны тарту етті. Жиын соңында білім басшылары өнерпаз ұл-қыздармен естелік суретке түсті.
