Наурыз мерекесі қарсаңында Шығыс Қазақстан облысының әкімі Бердібек Сапарбаев аймақтағы 18 емдеу-сауықтыру мекемесіне санитарлық көліктердің кілтін тапсырды, деп хабарлайды Altaynews.kz тілшісі.
Аймақ басшысы атап өткеніндей, соңғы 2 жылда облыста медицина саласына 37 көлік құралы сатып алынған. Қазір 18 көлік тапсырылды, енді екі айдан соң емдеу орындары тағы 14 көлікпен қаматамасыз етіледі. Республикалық бюджеттің есебінен 7 реанимобиль сатып алынады. 
Дегенмен бұл көрсеткіш те қажеттілікті толық жаппайды екен. Облыстағы медицина көліктерінің жаңартылуы 40 пайызды ғана құрайды. Өңір басшысы бұл көрсеткішті соңғы 2 жылда 60-70 пайызға жеткіземіз деген пікірін білдірді.
«Бұл мәшинелер біздің аймақ үшін өте қажет. Техника тұрғындардың игілігіне жаратылса деймін. Бүгінгі шара шалғайдағы облыс халқы үшін Наурыз мерекесі қарсаңында тамаша сыйлық болды» деді Б.Сапарбаев.
Облыстық денсаулық сақтау басқармасының мәліметі бойынша, 18 санитарлық көлікті сатып алуға облыс қоржынынан 53 900,0 мың теңге бөлініпті.
2013 жылы республикалық қаржының есебінен жедел жәрдем қызметіне 7 реанимобиль сатып алуға 164 500,0 мың теңге, сонымен қатар жедел жәрдемнің желілік бригадаларына 5 техника алуға 95 000,0 мың теңге бөлінді.
